1966-ம் ஆண்டு, `அன்பே வா' படத்தில் நாகேஷின் ஜோடியாக மனோரமா நடித்தார். நகைச்சுவை நடிப்பில் அவருக்குப் புகழ் தேடித்தந்த படங்களில் இதுவும் ஒன்று. நாகேசுடன் நடித்தது பற்றி மனோரமா கூறும்போது, 'நானும் நாகேசும் அனுபவிராஜா அனுபவி', 'சரஸ்வதி சபதம்' என்று அதிகமான படங்களில் இணைந்து நடித்து உள்ளோம். எங்கள் காமெடி மிகவும் நன்றாக இருப்பதாக அனைவரும் கூறுவார்கள். அது மிகவும் மகிழ்ச்சியான விஷயம்' என்றார்.
தேவர் பிலிம்ஸ் படத்திற்காக ஊட்டியில் படப்பிடிப்பு நடந்தது. அதில் மனோரமா குதிரையில் வருவது போல ஒரு காட்சி எடுக்கப்பட்டது. குதிரை சவாரியே தெரியாத மனோரமா அந்த காட்சியில் சிரமப்பட்டு நடித்தார்.
குதிரை திடீரென்று வெகு வேகமாக ஓடியது. அப்போது குதிரை சரிந்து விழுந்ததால் மனோரமாவும் தூக்கி வீசப்பட்டார். அந்த சமயத்திலும், குதிரையின் கடிவாளத்தை மனோரமா கெட்டியாகப் பிடித்துக்கொண்டு இருந்தார். மீண்டும் குதிரை எழுந்து ஓடத்தொடங்கியதால், கடிவாளம் இழுபட்ட வேகத்தில் மனோரமா கையில் எலும்பு முறிவு ஏற்பட்டது.
மனோரமா சிகிச்சை முடிந்து திரும்பிய பிறகு அக்காட்சி மீண்டும் படமாக்கப்பட்டு, படம் வெளிவந்தது.
மனோரமா நகைச்சுவை வேடங்களில் நடித்து வந்தபோது, கதாநாயகிகளின் பொறாமை குணத்தால், சில சிக்கல்களை சந்திக்க நேர்ந்தது.
இதுகுறித்து மனோரமா கூறியதாவது:-
'பொதுவாக எல்லா நடிகர் - நடிகைகளும் என்னிடம் அன்பாகவும், மரியாதையாகவும் நடந்து கொள்வார்கள்.
அந்தக் காலத்தில் ஒருசில கதாநாயகிகள், தங்களை மிகப்பெரிய நட்சத்திரங்களாக கருதிக் கொண்டு, மற்றவர்களை அடிமைபோல் நடத்துவார்கள். குறிப்பாக, சிரிப்பு நடிகை என்றால் அவர்களுக்கு கிள்ளுக்கீரை என்ற நினைப்பு.
ஒரு சமயம் என்னுடன் ஒரு படத்தில் நடித்துக்கொண்டு இருந்த ஒரு கதாநாயகி, நான் தலையில் அழகாக பூவும், அதற்கு ஏற்றாற்போல கழுத்தில் நகையும் அணிநëதிருந்ததை பார்த்தார்.
உடனே தயாரிப்பாளரை கூப்பிட்டு, 'மனோரமா தலையில் உள்ள பூவையும், கழுத்தில் உள்ள நகையையும் எடுத்துவிடச் சொல்லுங்கள். இல்லாவிட்டால் இனி உங்கள் படத்திற்கு என் கால்ஷீட் கிடையாது' என்று பயமுறுத்தினார். அதன் காரணமாக, நான் பூவை எடுத்துவிட்டு நடித்தேன்.
இவ்வளவுக்கும், எனது கதாபாத்திரத்திற்கு அந்த மேக்கப் அவசியம் என்றுதான் பூவும், நகையும் தரப்பட்டன. அது அந்த கதாநாயகிக்குப் பொறுக்கவில்லை.'
இவ்வாறு மனோரமா கூறினார்.
1971-ம் ஆண்டு 'கண்காட்சி' என்ற படத்தில் மனோரமா 9 வேடங்களில் நடித்தார். நகைச்சுவை கலந்த படம் அது.
'கல்யாணராமன்' படத்தின் 100-வது நாள் விழா சென்னையில் நடநëதது. விழாவில் கலந்து கொண்டு கவிஞர் கண்ணதாசன் பேசும்போது, 'டைரக்டர் கே.பாலசந்தர் எத்தனையோ, நடிகர் - நடிகைகளை அறிமுகப்படுத்தி பெருமை பெற்றிருக்கிறார். ஆனால், என்னால் ஒரே ஒரு மனோரமாவை மட்டும்தான் அறிமுகப்படுத்த முடிந்தது' என்றார்.
உடனே கே.பாலசந்தர், 'கவிஞர் கண்ணதாசன் நான் நூற்றுக்கும் மேற்பட்ட நட்சத்திரங்களை அறிமுகப்படுத்தியிருப்பதாகவும், அவர் மனோரமாவை மட்டுமே அறிமுகப்படுத்த முடிந்தது என்றும் கூறினார். நான் 100 பேர்களை அறிமுகப்படுத்தியதும், அவர் மனோரமாவை அறிமுகப்படுத்தியதும், இரண்டும் சரி சமமானதுதான். அந்த நூறு பேருக்கு சமமான திறமைசாலி மனோரமா' என்று குறிப்பிட்டார்.
நகைச்சுவை வேடங்களில் நடித்து வந்த மனோரமா பிற்காலத்தில் தாயாராக நடித்து முத்திரை பதித்தார்.
'பாட்டி சொல்லைத் தட்டாதே' படத்தில் வயதான வேடத்தில் நடித்த மனோரமா, சிலம்பம் சுற்றி ரவுடிகளை விரட்டுவது போன்ற சாகசங்களை செய்து நடித்தார். இந்தப்படம் மிகப்பெரிய வெற்றி பெற்றது.
'சின்னக்கவுண்டர்' படத்தில் விஜயகாந்தின் தாயாராகவும், 'கிழக்குவாசல்' படத்தில் கார்த்திக்கின் தாயாராகவும், 'அண்ணாமலை'யில் ரஜினியின் தாயாராகவும், 'அபூர்வசகோதரர்கள்' படத்தில் கமலின் தாயாராகவும் சிறப்பாக நடித்து அனைவரது பாராட்டுக்களையும் பெற்றார்.
மனோரமா நிறைய படங்களில் நடித்திருக்கிறார் என்றாலும், தனக்குப் பிடிக்காத கதாபாத்திரத்தில் நடிப்பதில்லை.
`ஆசை மனைவி' என்ற படத்தில் நடிக்க ஒப்பந்தம் ஆன பிறகு, தனது கேரக்டர் பிடிக்காததால் 'நடிக்க முடியாது' என்று கூறிவிட்டார்.
அதுபற்றிய மனோரமா கூறியதாவது:-
'ஒரு குடும்ப தலைவியே தனது மகளை வைத்து விபசார தொழில் நடத்துவது போல கதை அமைத்திருந்தார்கள். இதில் ஏதாவது மாற்றம் செய்ய முடியுமா? என்று கேட்டேன். 'முடியாது' என்றார்கள்.
'அப்படியானால் என்னை விட்டு விடுங்கள். நான் விபசார விடுதி தலைவியாகவும், விபசாரியாகவும் நடித்து இருக்கிறேன். ஆனால் தன் மகளை விபசாரம் செய்ய வைக்கும் குடும்ப தலைவியாக நடித்ததில்லை. குடும்ப தலைவி, மானத்தை காக்க வேண்டியவள். விபசாரம் செய்வதுபோல நடிக்க மாட்டேன். தப்பாக நினைக்காதீர்கள்' என்று சொல்லிவிட்டு, உடனடியாக முன்பணத்தையும் கம்பெனி உடைகளையும் திருப்பி அனுப்பிவிட்டேன்.'
இவ்வாறு மனோரமா கூறினார்.
0 comments:
Post a Comment