கர்ப்பகால குமட்டலை சமாளிப்பது எப்படி?

கர்ப்பகால குமட்டல் பிரச்னைகளை ஒவ்வொரு பெண்ணும் சந்தித்தே ஆக வேண்டும். குமட்டல், மசக்கை தோன்றும் விதம் போன்றவை ஒவ்வொரு நபருக்கும் வேறுபடும். சிலர் குமட்டலை சமாளித்துக் கொள்வார்கள். மற்றவர்கள் எந்த ஒன்றையும் ஜீரணிக்க முடியாமல் போகும்.

அறிகுறிகள்: காலையிலும், வேறு சிலருக்கு பிற வேளைகளிலும், சிலருக்கு நாள் முழுவதும் குமட்டல் நீடிக்கும். இந்த அறிகுறிக்கு கர்ப்ப காலத்தின் தொடக்கத்தில் ஏற்படும் ஹார்மோன் மாறுபாடுகள் முக்கிய பங்கு வகிக்கின்றன.

மசக்கை போன்ற பிரச்னைகளிலிருந்து நிவாரணம் பெற இந்த மகளிர் தினத்தில் மகளிர் நலன் கருதி சில யோசனைகளையும் வழிமுறைகளையும் நான் கூற விரும்புகிறேன்.

உணவில் கவனம் தேவை: தினமும் மூன்று வேளை சாப்பிடுவதற்குப் பதில், குறுகிய இடைவெளிகளில் சிறிது சிறிதாகச் சாப்பிடுங்கள். இத்தகைய சின்னச் சின்ன மாற்றங்களை மேற்கொள்வதன் மூலம் மசக்கையை எளிதில் சமாளிக்கலாம். காலையில் எழுந்ததும் குமட்டல் மிகவும் அதிகமாக இருந்தால், வறுத்த, உலர்ந்த உணவு அல்லது பிஸ்கட் போன்றவற்றை எழுந்த உடனே சாப்பிடுங்கள்.

குமட்டலைத் தவிர்க்க...: குமட்டலைத் தூண்டும் உணவுகளையும், வாசனைகளையும் தவிருங்கள். உங்களுக்கு ஏற்ற உணவாகத் தேர்ந்தெடுத்து தயாரித்துக் கொள்ளவும். பிரச்னை தராத, அதே சமயம் உடல் நலனுக்கு ஏற்ற உணவுப் பொருள்களைச் சாப்பிடுங்கள்.

கர்ப்ப காலத்தில் நுகர்தல் உணர்வு அதிகமாக இருக்கும். சூடான உணவுகளைவிட குளிர்ச்சியான உணவுகள் குறைந்த வாசனை கொண்டவையாக இருப்பதால் அவற்றை நாடுங்கள். தளர்ச்சியான உடைகளை அணியுங்கள். இடுப்பைச் சுற்றி இறுக்குவது போன்ற உடை அணிவது அசெüகரியத்தை உண்டாக்கும்.

குமட்டலைப் பற்றி நினைத்துக் கொண்டே இருந்தால்தான் அது அதிகமாகும். எவ்வளவு முடியுமோ அந்த அளவிற்கு கவனத்தை வேறு பக்கம் திருப்புங்கள். அதிகமாக வாந்தி வருவது அரிதுதான். அது நீடிக்குமானால் நீரிழப்பு மற்றும் "எலக்ட்ரோலைட்' சமச்சீரின்மை உண்டாகலாம். உடனே டாக்டரிடம் செல்லுங்கள்.

கர்ப்பக் காலத்தின் முடிவு வரை குமட்டல் தொடர்ந்தால் ரத்த அழுத்தம் மற்றும் சீறுநீர்ப் பரிசோதனை செய்து கொள்ள டாக்டரிடம் செல்லுங்கள்.

குழந்தையின்மைக்கு அதிநவீன சிகிச்சை வேண்டுமா?

குழந்தைகள் இல்லை' என்பது ஒரு குடும்பப் பிரச்னையாகவும், சமூகப் பிரச்னையாகவும் உள்ளது. குழந்தையின்மைக்கான சிகிச்சையில் அறிவியலும், ஆராய்ச்சியும் பெரும் பங்காற்றி வருகின்றன.

பல நவீன சிகிச்சை முறைகள் இப்போது உள்ளன. 1990-இல் குழந்தையின்மை சிகிச்சையில் 10 சதவீதம் வெற்றி கிடைத்தது. இப்போது குழந்தையின்மைக்கு மிகச் சிறு காரணமாக இருந்தாலும் அது எது என்று கண்டறிந்து தனித்தனி சிகிச்சையளிக்க முடியும்.

ஸ்கேனில் 3ஈ, 4ஈ டாப்லர் (ரத்த ஒட்டம் பார்ப்பது) ஆகிய நவீன வசதிகள் உள்ளன. இதனால் கர்ப்பப் பையில், சினைப்பையில், கருக்குழாயில் உள்ள குறைகளை ஹிஸ்டீரோ சால்பின்கோக்ராம் (Hystero Salphingogram) என்னும் எக்ஸ்-ரே எடுத்து குழந்தை வளரும் இடத்தில் உள்ள குறைபாடுகள், கருக்குழாயில் உள்ள அடைப்புகள், நீர் கோர்த்தல் ஆகியவற்றைக் கண்டுபிடிக்கலாம்.

ஆண்களுக்கு கணினி மூலம் விந்து ஆராய்தல் என்னும் முறையில் மரபணுவில் உள்ள குறைபாடுகளையும் கண்டுபிடிக்கலாம். நுட்பமான முறையில் விந்தின் குறைகளைக் கண்டுபிடித்து அதற்கான சிகிச்சையை அளித்தால் வெற்றி அடையலாம். ஆண்கள் வயது அதிகரிக்கும் பட்சத்தில் இத்தகைய குறைபாடுகள் அதிகரிக்கின்றன.

மருந்துகள் மூலமும் லாப்ரோஸ்கோப்பி அறுவைச் சிகிச்சைகள் மூலமும் பெரும்பாலான குறைகளை நிவர்த்தி செய்யலாம். கர்ப்பப்பையிலும், சினைப்பையிலும், கருக்குழாயிலும் ஏற்படும் நார்க் கட்டிகள், நீர்க் கட்டிகள், ரத்தக் கட்டிகள், நீர் கோர்த்தல் போன்றவற்றை ஸ்கேனில் 3ஈ லாப்ராஸ்கோப்பி, ஹிஸ்ட்ராஸ்கோப்பி மூலம் சிகிச்சையளித்து முழுமையாகக் குணப்படுத்தலாம்.

3ஈ லாப்ரோஸ்கோப்பி முதல் முறையாக சென்னையில் பிரசாந்த் ஆராய்ச்சி மையத்தில்தான் உபயோகப்படுத்தப்பட்டது. இதன் மூலம் மிக நுட்பமாக அறுவை சிகிச்சை செய்வதால் ரத்தக் கசிவு குறைவாக உள்ளது. கட்டிகளை எடுத்த பின் தையல் போட்டு அதை சாதாரண நிலைக்கு எடுத்து வருவதால், கர்ப்பம் அடையும் வாய்ப்பும் கர்ப்பத்தில் எந்த விதமான சிக்கல்களும் ஏற்படாமல் பாதுகாப்பதற்கும் உபயோகமாக இருக்கிறது. 3ஈ விஞ்ஞானத்தின் மகிமை இது என்று கூறலாம்.

இவ்வாறு நவீன அறுவை சிகிச்சை முறைகளை கடைப்பிடிப்பதால் குழந்தையின்மை சிகிச்சைக்கு வரும் 90 சதவீதம் பேருக்கும் கர்ப்பம் தரிக்கும் வாய்ப்பை அளிக்க முடியும். மீதமுள்ள 10 சதவீத பெண்களுக்கு கருப்பையில் விந்து செலுத்துதல் (IUI) அல்லது டெஸ்ட்டியூப் பேபி (ஐவிஎஃப் அல்லது இக்ஸி) விந்தை முட்டையில் செலுத்துதல் முறை தேவைப்படுகிறது. ஐமஐ ஆறுமுறை தோல்வி அடைந்தால் ICSIமுறைக்கு மாறுவது நல்ல பயனை அளிக்கும்.

1990-ஆம் ஆண்டு ஐவிஎஃப் முறையில் 8-10 சதவீத பெண்களுக்கு கர்ப்பமாகும் வாய்ப்பு இருந்தது. ஆனால் இன்றைய நவீன விஞ்ஞான முறைகளினால் 60-85 சதவீதம் வரை கர்ப்பமாகும் வாய்ப்பு உள்ளது. இது எப்படி சாத்தியமாகும் என்று நீங்கள் யோசிக்கலாம். நவீன கருவிகளையும் முறைகளையும் உபயோகிப்பதே இந்த மகத்தான வெற்றிக்கு காரணம்.

IVF லேப்பில் ஹ்யுமிடிக்ரிப் என்னும் முட்டையையும், கருவையும் நம் உடலில் இருக்கும் வெப்ப நிலை, ஆக்சிஜன் போன்ற வாயுக்களையும் நம் உடலில் இருக்கும் நிலை ஆகியவற்றுடன் வைக்க உதவுவதால் வெற்றி அடையும் வாய்ப்பு அதிகரிக்கிறது.

இதைத் தவிர, லேசர் கணினி உபயோகிப்பதால் 38 வயது தாண்டியவர்களுக்கும் பலமுறை தோல்வி அடைந்தவர்களுக்கும் கார்ப்பமாகும் வாய்ப்பு அதிகரித்துள்ளது. 5வது நாள்கருவை (பிளாஸ்டோசிஸ்ட்) கர்ப்பபையில் செலுத்துவதால் வெற்றி அடையும் வாய்ப்பு அதிகரித்துள்ளது. வெற்றி அடையும் வாய்ப்பை அதிகரிக்க முட்டை, விந்து, கர்ப்பப்பை இவை மூன்றும் சிறப்பாக அமைய வேண்டும். முட்டை வளர்ச்சியையும் அதன் தன்மையும் முதல் தரமாக ஆக்குவதற்கு சிறப்பு மருந்துகளும் யோகா, அக்குபஞ்சர், இசை ஆகியவையும் மிக உபயோகமாக உள்ளன.

எல்லோருக்கும் எவ்வளவு வயதானாலும் அவர்களுடைய முட்டைதான் வேண்டும் என்று நினைப்பது சகஜம். இன்றைய மருத்துகளும் உபயோகிக்கும் முறையில் உள்ள முன்னேற்றங்களும் இதற்கு மிகவும் உதவுகிறது. "ஐவிஎஃப் லைட் ப்ரோட்டாக்கால்' என்ற முறையைக் கடைப்பிடித்து பிறகு 42 வயது வரை உள்ள பெண்களுக்கு தன்னுடைய முட்டையை உபயோகித்து கரு உருவாக்கும் வாய்ப்பு அதிகரித்துள்ளது.

விந்தணு தரத்தை அதிகரிக்க மருந்துகளும் லாப்ரோஸ்கோப்பி அறுவைச் சிகிச்சையும் உள்ளன. இதைத் தவிர, மிகவும் அதிநவீன (ஐ.எம்.எஸ்.ஐ) முறையினால் விந்தணுவை கணினி (கம்ப்யூட்டர் ஜெனரேட்டட் இமேஜ்) மூலம் 7000 மடங்கு பெரிதாக பார்த்து மிகவும் சிறப்பான விந்தை தேர்வு செய்யலாம்.

சிறப்பான கருவை உருவாக்கி அதில் மிகவும் சிறப்பான கருவை தேர்ந்தெடுப்பது எப்படி? எம்ப்ரியோஸ்கோப் என்பது மிகவும் அதிநவீன கருவி. இந்த இன்குபேட்டரில் கருவை பாதுகாப்பாக வைக்கிறோம். இதில் கேமரா உள்ளதால் கருவின் வளர்ச்சியை ஒவ்வொரு நிமிஷமும் பதிவு செய்ய முடியும். இதனால் வளர்ச்சியில் குறை இருந்தால் அதைக் கண்டுபிடித்து கருப்பையில் செலுத்தும் முன் சிறந்த கருவை தேர்ந்தெடுக்க முடிகிறது. இதனால் கர்ப்பமாகும் வாய்ப்பை 10 முதல் 12 சதவீதம் வரை அதிகரிக்கலாம்.

கர்ப்பப் பையின் உட்புறச் சுவரின் ஒட்டும் தன்மையை அதிகரிப்பதற்கு எம்ப்ரியோக்ளு எனும் பசை உள்ளது. இதைத் தவிர, ஹிஸ்டெரோஸ்கோப்பி மூலம் கர்ப்பப்பையின் உள் பகுதியை நோக்கி ஸ்கிராட்ச் டெஸ்ட் மூலம் சிறு அளவில் சதையை சுரண்டி எடுப்பதால் வளர்ச்சிக் காரணிகள் அதிகரித்து கரு கருப்பையில் ஒட்டி வளருவதற்கு அதிக வாய்ப்பு உள்ளது என்பதை அனுபவத்தால் கண்டுபிடித்துள்ளோம். இவ்வாறு விந்து, கரு, கருப்பை ஆகியவைகளின் ஆரோக்கியம் நவீன சிகிச்சை முறைகளாலும் நவீன சாதனங்களாலும் சிறப்பாக்கப்படுவதால் கர்ப்பமாகும் வாய்ப்பு 10-20 சதவீதம் அதிகரிக்கிறது. கருச்சிதைவு ஏற்படும் வாய்ப்பு 10 சதவீதம் குறைகிறது.

பெண்களுக்கு இந்த மகளிர் தின அறிவுரையாகக் கூற வேண்டுமானால் திருமணம் ஆன ஓர் ஆண்டுக்குள் கர்ப்பம் அடையவில்லையென்றால், மருத்துவரை அணுகலாம். முக்கியமாக மாதவிடாய் தாமதமாக இருந்தாலும், மிகவும் வலியோடு இருந்தாலும் தாம்பத்யத்தில் சிக்கல் இருந்தாலும் மருத்துவரை அணுகலாம். முக்கியமாக 35 வயதுக்கும் மேற்பட்டவர்கள் காலம் தாழ்த்தாமல் மருத்துவரின் ஆலோசனை பெறுவது நல்லது.

எச்சரிக்கை! புதிய வைரஸ்கள்..!

இன்று கம்ப்யூட்டருக்குக் கெடுதல் விளைவிக்கும், முடக்கிப் போடும் மால்வேர் புரோ கிராம்கள், இப்போது புதிய வடிவமைப்பில் வலம் வருவதைப் பல ஆய்வு நிறுவனங்கள் கண்டறிந்துள்ளன.

வழக்கமான ட்ரோஜன் ஹார்ஸ்,பாட்நெட் மற்றும் பிஷிங் அட்டாக் என கம்ப்யூட்டரில் புகுந்து நம் பெர்சனல் தகவல்களைத் திருடுவதும், செயல்பாட்டினை முடக்குவதுமான வைரஸ்களும் மால்வேர்களும் இன்னும் வந்து கொண்டுதான் இருக்கின்றன. இவற்றிற்கு இடையே, புதிய வகை தாக்குதல்களுடன் சில புதிய வைரஸ்கள் வருவதாகக் கண்டறியப்பட்டுள்ளது.

ஷமூன் (Shamoon) என்னும் புதிய மால்வேர் புரோகிராம் ஒன்று பல நாடுகளில் கண்டறியப்பட்டுள்ளது. குறிப்பிட்ட சிலர், அல்லது நிறுவனங்களை இது தாக்குகிறது. குறிப்பாக மின்சக்தி நிறுவனங்களை இது இலக்காகக் கொண்டு தாக்குகிறது. செக்யூலர்ட் (Seculert) என்ற இஸ்ரேல் நாட்டு நிறுவனத்தின் ஆய்வு மையக் கணக்கின்படி, முதலில் இது கம்ப்யூட்டர் ஒன்றினை, இணையம் வழியே கைப்பற்றுகிறது.

பிறகு அங்கிருந்து கொண்டு, நிறுவனங்களைத் தாக்குகிறது. அதன் பின்னர், தான் தங்கி உள்ள கம்ப்யூட்டரில் உள்ள பைல்களை, திருத்தி எழுதுகிறது. அதன் மாஸ்டர் பூட் ரெகார்டையும் (MBR Master Boot Record) மாற்றுகிறது. இவ்வாறு மாற்றப்பட்டால், பின்னர் அந்த கம்ப்யூட்டரை இயக்கவே முடியாது. செக்யூலர்ட், மாஸ்கோவில் இயங்கும் காஸ்பெர்ஸ்கி லேப், அமெரிக்க ஆண்ட்டி வைரஸ் நிறுவனமான சைமாண்டெக் ஆகிய நிறுவனங்களால், இந்த வைரஸ் எத்தகைய தகவல்களைக் குறி வைத்து தாக்குகிறது என அறிய முடியவில்லை.

புதிய வைரஸ் ஜாக்கிரதை...! 2010 ஆம் ஆண்டில் ஈரான் நாட்டின் நியூக்ளியர் திட்டத்தினைக் கெடுத்த ஸ்டக்ஸ்நெட் வைரஸ் போல இது இயங்குமோ என்ற சந்தேகத்துடன் இந்த ஆண்ட்டி வைரஸ் நிறுவனங்கள் இதனை அணுகத் தொடங்கி உள்ளனர். இவற்றுடன் இதே போல பலவகையான குறிப்பிட்ட கெடுதல் வேலையை இலக்காகக் கொண்டு Duqu, Flame, and Gauss என மால்வேர் புரோகிராம்கள் உலா வருகின்றன. இவை மால்வேர் மற்றும் வைரஸ் புரோகிராம்களைக் கண்டறியும் புரோகிராம்களிடமிருந்து தப்பித்துவிடும் வகையில் வடிவமைக்கப்பட்டுள்ளன.

1990 ஆம் ஆண்டு வாக்கில் வந்த வைரஸ்கள் தான், தங்கள் இலக்காக மிக மோசமான விளைவைக் கொண்டிருந்தன. வேகமாகப் பரவி, மால்வேர் என்பதை ஒவ்வொரு கம்ப்யூட்டர் பயனாளரும் உச்சரித்து பயப்பட வேண்டும் என்ற இலக்கோடு இவை வடிவமைக்கப்பட்டன. எவ்வளவு நாச வேலைகளைச் செய்திட முடியுமோ, அவற்றை மேற்கொண்டன. CodeRed, Nimda போன்றவை இந்த வகையைச் சார்ந்தவையாக இருந்தன.

மிக மோசமான SQL Slammer இணைய தளங்களையே முடக்கிப் போட்டன. அதைப் போன்றவையே இப்போதும் பரவி வருகின்றன. தாங்கள் கைப்பற்றிய கம்ப்யூட்டர்களிலிருந்து பாஸ்வேர்ட், யூசர் நேம், வங்கிக் கணக்குகள் அவை குறித்த பாஸ்வேர்ட் உட்பட தகவல்கள் ஆகியவற்றைக் கண்டறிந்து வர்த்தக நிறுவனங்களை முடக்குகின்றன.

மேலும், கைப்பற்றிய கம்ப்யூட்டர்களைத் தளங்களாகக் கொண்டு ஸ்பேம், பிஷிங் அட்டாக் அல்லது மற்ற மால்வேர் புரோகிராம்களை பரப்புகின்றன. இதுவரை எரிச்சல் தரும் ஓர் புரோகிராமாக இருந்த மால்வேர்கள் தற்போது கண்டு அஞ்ச வேண்டிய புரோகிராம்களாக மாறிவருகின்றன. ஆனால், இவை அனைத்திற்குமான பாதுகாப்பு வளையங்களை, தற்போது இயங்கும் ஆண்ட்டி வைரஸ் புரோகிராம்கள் விரைவில் உருவாக்கித் தரும் என்ற நம்பிக்கை அனைவரிடமும் உள்ளது.

உலகத்தை மாற்றப்போவது உங்கள் குழந்தைதான்

         கேத்தரீன் – அமெரிக்காவின் பென்சில்வேனியாவில் வசிக்கும் 8 வயது சிறுமி. பத்தாயிரம் குடும்பங்களை காத்ததற்காக, திராகன் பிளை என்ற விருதை ஜனாதிபதி பராக் ஒபாமாவிடமிருந்து பெற்றிருக்கிறாள்.


நான்கு வயதில் தன் அம்மாவுடன் உட்கார்ந்து டிவி பார்த்துக் கொண்டிருந்த போது டிவியில் ஆப்ரிக்காவில் 30 செகண்டுக்கு ஒருவர் மலேரியாவால் உயிர் இழப்பதாக ஒரு செய்தி காட்டப்பட்டது. உதவ விரும்புபவர்கள் ஒரு குடும்பத்திற்கு ஒரு கொசு வலை வழங்க 10 டாலர் நன்கொடை தரலாம் என்ற செய்தி கேத்தரீனை சிந்திக்க வைக்கிறது.

ஒரு உயிரை 10 டாலர் கொசுவலையால் காக்க முடியுமா? அப்படியென்றால் நாம் பணம் அனுப்பலாம் என்கிறாள். மகிழ்ச்சியாக இருந்தது அவளுக்கு. இதே மகிழ்ச்சி அந்த கொசுவலை கிடைத்தவருக்கும் கிடைக்குமல்லவா? ஆனால் ஒரே ஒருவருக்குத்தான் இல்லையா? மற்றவர்களுக்கு? இதை ஏன் நம் நண்பர்கள் உறவினர்களிடம் எல்லாம் சொல்லி அவர்களையும் அனுப்பச் சொல்லக்கூடாது.

கேத்தரீன் தன் நண்பர்களின் பிறந்த நாள் பார்ட்டி, விருந்துகள், சர்ச் ப்ரேயர் மீட்டிங்குகள் என தான் எங்கு சென்றாலும் மலேரியாவால் ஆப்ரிக்காவில் ஏற்படும் உயிரிழப்பை பற்றி எடுத்துச் சொல்லி மற்றவர்களை உதவத்தூண்டுகிறாள்.

கேத்தரீன் பெரிதாக எதையும் செய்துவிடவில்லை. பலரும் அவசரத்தில் காட்ட மறந்த மனிதாபிமானத்தை நினைவுபடுத்தினாள்.

ஒரு நாள் அல்ல, இரண்டு நாள் அல்ல, நான்கு வருடம் தொடர்ந்து முயற்சிக்கிறாள். விளைவு பத்தாயிரம் கொசுவலைகள் நன்கொடையாக அனுப்பப்பட்டது. அதனால்தான் ஜனாதிபதியின் கைகளால் விருது வழங்கி கௌரவிக்கப்படுகிறாள்.

ஆயிரக்கணக்கான உயிர்களை காப்பாற்றுவதுதான் என்றில்லை. ஒரு உயிரை காப்பாற்றுவதுகூட வணங்கக்கூடிய செயல்தான். நமக்கெல்லாம் டிவியில் காட்டப்படும் உயிரிழப்புகள் இன்னொரு செய்தி. ஆனால் கேத்தரீன் இன்னொரு உயிர் என்று பார்த்ததுதான் இத்தனைக்கும் காரணம்.

இதைப் படித்தவுடன் உங்களுக்கு இரண்டு விதமான சிந்தனைகள் தோன்றலாம்.

ஒன்று கேத்தரீன் என்ற அந்த சின்னஞ்சிறு பெண்ணாலேயே இவ்வளவு செய்ய முடியும் என்றால் நம்மால் எவ்வளவு முடியும்.

என் குழந்தையையும் கேத்தரீன் போன்று மனித நேயம் மிக்கவளாக சமூகத்தை குற்றம் சொல்லிக் கொண்டிருக்காமல் அதை மாற்றி அமைப்பவளாக வளர்ப்பேன்.

நல்லது, நம் குழந்தைகள் புதியதோர் உலகம் செய்ய ஏற்ற சூழலை ஏற்படுத்தித் தருவோம்.

நூற்றுக்கு நூறு இயக்கத்தில் நம்மால் முடிந்த எளிய செயல்களைத்தான் நாம் செய்யப் போகிறோம்.

உதாரணத்திற்கு நீரில் தத்தளிக்கும் எறும்பை எடுத்து வெளியில் விடுவது நம்மை பொறுத்தவரை பெரிய வேலையில்லை. ஆனால் அந்த எறும்புக்கு அது வாழ்க்கை அல்லவா?

நூற்றுக்கு நூறு இயக்கத்தில் நீங்கள் செய்யப் போவது உங்களுக்கு எளிய செயல்தான். ஆனால் அதனால் பலன் அடைந்தவர்களுக்கோ அது அவர்களின் வாழ்க்கையின் போக்கையே மாற்றும் ஒன்று.

நிச்சயமாய் சொல்கிறேன். இந்த உலகத்தை மாற்றப் போவது நீங்களும் உங்கள் குழந்தைகளும்தான்.

ஏன் வேண்டும் உற்சாகம்?

வாழ்வில் உற்சாகமாய் இருங்கள் என்று சுயமுன்னேற்ற நூல்கள் சொல்கின்றன. சூப்பர்வைஸரும் சொல்லுகிறார். நண்பர்களும் சொல்கிறார்கள். நடிகர்களும் சொல்கிறார்கள். யார் சொல்கிறார்களோ இல்லையோ, தொலைக்காட்சி நிகழ்ச்சி

தொகுப்பாளினிகள் தவறாமல் சொல்கிறார்கள்.

சொல்பவர்கள் சொல்லட்டும். முதலில் நீங்கள் முடிவெடுங்கள்.

நீங்கள் உற்சாகமாகவும் நம்பிக்கையோடும் இருக்க வேண்டியது யாருக்காக? உங்கள் ஊக்கத்தைத் தூக்கி நிறுத்துவது யாருக்காக?

நீங்கள் வேலை பார்க்கும் நிறுவனத்தின் ஆதாயத்திற்காகவா?

உற்சாகமாய் நீங்கள் சொல்லும் ஜோக்குகளால் உங்களுடன் இருப்பவர்களுக்கு செலவில்லாமல் பொழுது போகவா?

உங்கள் உற்சாகம் யாருக்காக? இதற்கு உண்மையான பதில்…

உங்களுக்கே உங்களுக்காக!!

உங்களுக்கு உங்களின் தகுதிகள், திறமைகள், ஆரோக்கியம், செல்வாக்கு எல்லாம் புரிகிறபோதெல்லாம் நீங்கள் உற்சாகமாகிறீர்கள். .

நடுத்தர வயதை எட்டும் போதும் வேகவேகமாய் நடக்கும்போதும் மூச்சிரைக்காமல் இருக்கிறதா? உங்களையும் அறியாமல் உற்சாகம் வரும். மற்றபடி, தெரு முனையில் இருக்கும் கடையில் கொத்தமல்லி வாங்கக்கூட பைக் சாவியைத் தேடுபவராக நீங்கள் இருக்கலாம். ஆனால் வியர்க்க விறுவிறுக்க ஒரு மணிநேரம் நடந்துவிட்டு வரும்போது மறுநாள் வாக்கிங் நேரம் வருகிறதா என்று மனசு ஏங்குகிறதே…. ஏன்?

விஷயம் நடைப்பயிற்சியில் இல்லை. உங்களால் நடக்க முடிகிறது என்பதில் உங்களுக்கு வருகிற உற்சாகம்தான் அது.
ஒவ்வொரு மனிதனும் தன் பலங்கள் புரியப் புரிய உற்சாகமாகிறான்.

அதற்கு அடிக்கடி வாய்ப்பளித்துக் கொள்பவர்கள் வளர்கிறார்கள். அது மற்றவர்களுக்கும் பயன்படுகிறது.

சிலசமயம் நாட்கள் நகர்வதே பெரிய விஷயமாய் இருக்கும். “அட! இன்றைக்கு சனிக்கிழமையில்லையா? வியாழக்கிழமைதானா?” என்று சலித்துக் கொள்கிறீர்களா? அப்படியானால் அந்த வாரம் நீங்கள் அதிகமாக செயல்படவில்லை என்று அர்த்தம்.

சோனியின் சாதனை - அறியவகை டேப்லெட்!

சோனி நிறுவனம் 7 இன்ச் விட சிறிய திரை கொண்டுள்ள உலகின் முதல் டேப்லெட் அறிமுகப்படுத்தியுள்ளது. சோனி எக்ஸ்பெரிய இசட் அல்ட்ரா என்று அழைக்கப்படும் இந்த புதிய  இந்த வாரம் ஜப்பான் மட்டும் தொடங்கி 52,000 யுவான் விலையில் கிடைக்கும்.


மாடல் முக்கிய அம்சங்கள் ஸ்டைலஸ் ஆதரவுடன் 6.4 இன்ச் டிஸ்ப்ளே, குவாட் கோர் 2.2GHz ஸ்னாப்ட்ராகன் 800 சிப்செட், 6.5mm திக் ப்ரோஃபைல், வாட்டர்ப்ரூஃப் மற்றும் கீறல் எதிர்ப்பு க்ளாஸ் பாடி மற்றும் ஆண்ட்ராய்டு 4.2 (ஜெல்லி பீன்) ஆப்பரேட்டிங் சிஸ்டம் ஆகியவை அடங்கும்.


எக்ஸ் பெரிய இசட் அல்ட்ரா டேப்லெட்டின் மற்ற குறிப்புகள் 16GB ஆண்போர்டு சேமிப்பு, 2GB ரேம், 64GB வரை microSD அட்டை ஆதரவு, NFC, microUSB 2.0, ப்ளூடூத் 4.0 மற்றும் 3,050 mAh திறன் கொண்ட பேட்டரி ஆகியவை அடங்கும். சோனியின் புதிய டேப்லெட்ல் 8MP கேமரா தக்க வைத்து கொண்டுள்ளது, இந்த மாடலில் இருந்து எல்இடி ப்ளாஷ் நீக்கப்பட்டது.


பெருமளவில் உற்பத்தி செய்யும் 7 இன்ச் திரை அளவு கீழ் உருவாக்கியுள்ளது இதுவே முதல் முறையாகும். பெரும்பாலான உற்பத்தியாளர்கள் டேப்லெட்டில் 7 மற்றும் 8 இன்ச் திரை அளவுகள் தேர்ந்தெடுக்கின்றனர். நிறுவனம் சமீபத்தில் ஸ்மார்ட்போன்கள் மற்றும் டேப்லெட்க்கான உலகின் முதல் யுஎஸ்பி டிரைவ்களை தொடங்கப்பட்டது குறிப்பிடத்தக்கது.

கற்பித்தலில் புதிய கண்டுபிடிப்பு - தூங்கும் வகுப்பு..?

நாம் படுத்து உறங்கியதும் நமது உடம்பின் அனைத்து உறுப்புகளும் ஒரே நேரத்தில் தூங்கத் தொடங்காது.முதலில் கண்கள், பின்னர் வாசனையை உணரும்.உறுப்புகள், பின்பு சுவை மொட்டுக் கள், காது, இறுதியாக தோல் ஆகியவை தூங்கும். ஆனால், நாம் விழிக்கும்போது இது தலைகீழாக நிகழும். முதலில் தோல் தன் வேலையைத் தொடங்கும். பின்னர் கேட்கும் உறுப்புகள், சுவை உணரும் உறுப்புகள், நுகரும் உறுப்புகள், கடைசியாக கண்கள் விழிப்படைகின்றன.இதை அறிந்த நியுயார்க்:ஹப் ஸ்பாட் என்ற பிரபல சாப்ட்வேர் கம்பெனியில் ஊழியர்கள் தூங்குவதற்காக அலுவலகத்தில் கட்டில், மெத்தை போட்டு, தூங்கும் அறையை ஏற்பாடு செய்திருப்பதுடன் அவர்களை அவ்வப்போது கோழித் தூக்கம் போடும்படி ஊக்கப்படுத்துகிறார்கள். இப்படி தூங்குவதால்தால் அங்குள்ள ஊழியர்களுக்கு அருமையான புதிய ஐடியாக்கள் வருகின்றன என்று தெரிவித்துள்ளது குறிப்பிடத்தக்கது.


இதற்கிடையில் பெரும்பாலான பெற்றோர் தங்கள் குழந்தைகளிடன் பகல்லே படுத்துத் தூங்காதே. கெட்ட பழக்கம், இதுவே பழக்கமாயிட்டா உடம்பு பெருத்துப் போகும்! என்ற வசனங்களை சொல்லக் கேட்டிருப்பீர்கள். ஆனால் நம்மை மீறி வரும் தூக்கத்தை உடனடியாக தழுவாமல் அலட்சியப் படுத்துவதான் பல்வேறு தவறுகள் ஏற்பட காரணமாகிறது. எனவே, குட்டித் தூக்கம் எனப்படும் கோழி தூக்கம் போட்டு எழுந்தால் உற்சாகம் ஏற்பட்டு, சுறு சுறுப்புடன் பணி செய்ய முடியும் என்கிறது பல்வேறு ஆய்வு முடிவுகள். இதற்கு இப்போது பிரபலமான நரம்பியல் துறை வல்லுநர்களும் முழு ஆதரவு தருகின்றனர்.இதைக் கருத்தில் கொண்டு சீன கல்வியாளர்கள், சோதனை முயற்சியாக மழலையர் வகுப்புகளில் (எல்.கே.ஜி., யூ.கே.ஜி.) படிக்கும் பிள்ளைகளுக்கான பாடத்திட்டத்தில் தூங்கும் வகுப்பையும் சேர்க்கும்படி பரிந்துரைத்துள்ளனர்ர்.


உல்கம் முழுவதிலுமுள்ள பள்ளி வகுப்புகளின் இடையே பிள்ளைகள் சோர்வடைந்து விடுவதால், அவர்களால் உற்சாகத்துடன் தொடர்ந்து படிப்பில் கவனம் செலுத்த முடியாமல் போய்விடுகின்றது.பல ஆண்டுகளாக இந்த பிரச்சனை தொடர்பாக கூர்ந்து கவனித்து வந்த சீன கல்வியாளர்கள், சோதனை முயற்சியாக மழலையர் வகுப்புகளில் (எல்.கே.ஜி., யூ.கே.ஜி.) படிக்கும் பிள்ளைகளுக்கான பாடத்திட்டத்தில் தூங்கும் வகுப்பையும் சேர்க்கும்படி பரிந்துரைத்தனர்.


இதன்படி, மதிய உணவு இடைவேளைக்குப் பிறகு சுமார் 20 நிமிடங்களுக்கு மழலையர் வகுப்பு பிள்ளைகள் உறங்க வைக்கப்பட்டனர். இந்த புதிய திட்டம் கைமேல் பெரிய பலனை தந்துள்ளது. ஓய்வுக்கு பின்னர் கண் விழித்த பிள்ளைகள், முன்பு எப்போதும் இல்லாத அளவிற்கு உற்சாகத்துடனும், அறிவுக் கூர்மையுடனும் படிப்பில் நாட்டம் செலுத்துவதை பார்க்க முடிந்தது.இதர மேல்வகுப்பு மாணவர்களுக்கும் இந்த திட்டத்தை விரிவுப்படுத்தலாமா? என்பது தொடர்பாக சீன அரசின் கல்வித்துறை அதிகாரிகள் தற்போது ஆலோசித்து வருவதாக் செய்திகள் வெளியாகியுள்ளது.

வெற்றி இரண்டு விதம்

வழியில் வருகிற வாய்ப்புகளைப் பயன்படுத்திக்கொண்டு வெற்றி காண்பது ஒரு விதம். மற்றவர்கள் கண்களுக்கு எளிமையாய்த் தென்படும் விஷயங்களில்கூடப் பெரிய வாய்ப்புகளைக் கண்டறிந்து, அதன் வழியே வெற்றிபெறுவது இன்னொருவிதம்.


பாறைகள் குவிந்துகிடக்கிற இடம், பார்ப்பவர் கண்களின் தன்மைக்கேற்ப கலைக்கூடமாகவோ குவாரியாகவோ மாறுகிறது.

ஆள்நடமாட்டமில்லாத இடத்தில், விவசாயத்திற்கும் பயனில்லாத வெற்றிட.ம், சிலர் கண்களில் மட்டும் ஓய்வு நேர இல்லங்கள் உருவாக்குவதற்குறிய இடமாகத் தெரிகிறது.

மறந்துவிடாதீர்கள்! ஒரு பொருளோ, இடமோ, மனித ஆற்றலோ நிகழ்காலத்தில் என்னவாக இருக்கிறது என்பதல்ல முக்கியம். எதிர்காலத்தில் என்னவாக வளரும் என்பதுதான் முக்கியம். வாய்ப்புகள் வழியில் வரும்வரை காத்திருக்காமல், விலகிச் செல்லும் வாய்ப்புகளைக்கூட வழிமறித்துப் பயன்படுத்தும் துடிப்பு இருந்தால் இத்தகைய புதுமைகள் புத்தியில் உதிக்கும்.
இப்படிப் புதுமையாய் சிந்திப்பதில் முதல்தடை… விமர்சனங்கள். ஆர்வமாய்ப் புதிய விஷயங்களைச் சொல்ல வருபவர்கள்கூட, விமர்சனங்கள் வந்ததும் துவண்டுவிடுவார்கள்.

அதனால்தான் ஓர் அறிஞர் சொன்னார், “புதுமையாய் சிந்திக்க அறிவு மட்டும் போதாது, துணிவும் அவசியம்” என்று. சமுத்திரம் என்பது குடிக்கப் பயன்படாத தண்ணீர் என்று பார்த்து ஆதிகாலத்தில் அநேகம்பேர் அலட்சியம் செய்திருப்பார்கள்.

அதில் உப்பு இருக்கிறது என்று ஒருவன் முதலில் கண்டுபிடித்திருப்பான், முத்து கிடைக்கிறது என்று இன்னொருவன் கண்டுபிடித்திருப்பான். மீன் பிடித்துச் சாப்பிடலாம் என்று மற்றொருவன் கண்டுபிடித்திருப்பான்.

காலகாலமாய் இருக்கிற கடல், தேவையில்லாத தண்ணீர்ப்பரப்பு என்று விலகி நடக்காமல் வித்தியாசமாய்ச் சிந்தித்தவன்தான் இந்தப் புதுமைகளையெல்லாம் பூமிக்குக் கொடுத்தான்.

இந்தப் புதுமைக் கண்ணோட்டம் என்பது, பணம் சம்பாதிக்கும் முறை என்று மட்டும் பார்த்தால், வளர்ச்சி இருக்காது. புதுமைக் கண்ணோட்ட வழிகள் வாழ்க்கையை சுவாரசியமாக்கிக் கொள்கிற முறை. அதுவே ஒரு வாழ்க்கை முறை.

கண்ணில்படுகிற எதிலும் எண்ணிலடங்காத வாய்ப்புகள் இருக்கின்றன என்கிற நம்பிக்கை இதற்கான முதல் தேவை. சாதாரணமான ஒன்றைக்கூட சுவாரசியமாய் மாற்றுகிற படைப்பாற்றல் இதற்கான இரண்டாவது தேவை. படைப்பாற்றல் என்கிற கண்ணுக்குத் தெரியாத சக்திக்கு சொல்வடிவம் கொடுக்கிற திறமை, இதற்கான மூன்றாவது தேவை. ஒன்றை சுவாரசியமாக சிந்தித்து, செயல்படுத்தும் வரையில் பின்வாங்காத முயற்சியும் உழைப்பும் நான்காவது தேவை.

இந்த அம்சங்களை யாரெல்லாம் வளர்த்துக் கொள்கிறார்களோ அவர்கள், அதிசயமான வெற்றிகளை அனாயசமாகப் பெற்று விடுகிறார்கள்.

உங்களுக்குள் ஒரு தீப்பொறி இருந்தால், ஊதி ஊதி வளர்க்க வேண்டியவர் நீங்கள்தான். அது பெருநெருப்பாக உருவம்பெறும்வரை உங்களால்தான் அதைக் காப்பாற்ற முடியும். அதுவரையில் அதன் வெளிச்சம் ஊருக்குத் தெரியாது.

உங்களுக்குள் உதிக்கிற புதிய கண்ணோட்டங்கள் ஒவ்வொன்றுமே அத்தகைய தீப்பொறிகள்தான்.

உற்சாமாய் ஊதி ஊதிப் பெருக்குங்கள்
உங்களால் முடியும்…. கலக்குங்கள்.

கலப்பட பெருங்காயத்தை அறியும் வழி

பெரின்னியல் (pernnial plant)   என்னும் சிறு மரவகையின் பிசின்தான் பெருங்காயம் என்பது. இது இந்தியாவில் பஞ்சாப், காஷ்மீர் ஆகிய பகுதிகளிலும், வெளிநாடுகளில் ஈரான், ஆப்கானிஸ்தானம், துருக்கி, பெஷாவர் போன்ற இடங்களிலும் இந்தச் சிறு மரம் நன்றாக விளைகிறது.

மார்ச்-ஏப்ரல் மாதங்களில் பூ பூப்பதற்கு முன்பாக, நான்கு, ஐந்து வருடங்களாக வளர்ந்து வந்துள்ள சிறுமரத்தின் கேரட் வடிவத்திலுள்ள வேர்ப்பகுதியை நறுக்கி, அதன் மேல் பகுதியை மண்ணாலும் காய்ந்த குச்சிகளாலும் மூடிவைப்பார்கள். சில நாட்களுக்குப் பிறகு, வேரின் நறுக்கிய பகுதியிலிருந்து பால் போன்று வடிந்துள்ள பிசினைச் சுரண்டி எடுத்துவிடுவார்கள். மறுபடியும் வேரை நறுக்கி, சில நாட்களில் அதில் படிந்துள்ள கோந்து போன்ற பகுதியைச் சுரண்டிவிடுவார்கள். இப்படியாக வேரை நறுக்க நறுக்க, வெளிப்படும் பிசின் முழுவதுமாக வரும்வரை தொடர்ந்து செய்துகொண்டே இருப்பார்கள்.

இருவகை நிறங்களில் இந்தப் பிசின் கிடைக்கின்றன. கருப்பு மற்றும் வெள்ளை நிறங்களில் அவை இருக்கும். கருஞ்சிவப்பான பிசினும் கருப்பு வகையில்தான் சேர்க்கப்படும். வெள்ளை நிறமாக உள்ள பால் பெருங்காயம் நல்ல மணமும் மருத்துவக் குணங்கள் அதிகம் கொண்டதுமாகும்.

கலப்படம் செய்து விற்கப்படும் பெருங்காயத்தை அறிந்து கொள்ள ஒரு வழி இருக்கிறது. இந்தப் பெருங்காயத்தைத் தண்ணீரில் போட்டால் கரையாமல் கோந்து போலக் காணும். அந்தக் கோந்தை எடுத்து எரித்தால் கரி மட்டுமே மிஞ்சும். கலப்படமில்லாத சுத்தமான பெருங்காயமானால் தண்ணீரில் போட்டவுடன் கரைந்து தண்ணீர் பால் நிறமாக மாறிவிடும். மேலும் சுத்தமான பெருங்காயத்தின் மேல் தீக்குச்சியைப் பற்றவைத்துப் போட்டால் கற்பூரம் போலப் பற்றிக் கொண்டு முழுவதுமாக எரிந்துவிடும். பெருங்காயத்திலுள்ள "ஓலியோ ரெஸின்' மிக உயர்ந்த மருத்துவ குணங்களைக் கொண்டது.

பாவப் பிரகாசர் எனும் முனிவர் பெருங்காயத்தைப் பற்றி குறிப்பிடுகையில் அது உஷ்ணம் (சூடான வீர்யத்தைக் கொண்டது), பாசனம் (எளிதில் தானும் ஜீரணமாகி தன்னைச் சுற்றியுள்ள மற்ற உணவையும் விரைவில் ஜீரணம் செய்துவிடும்), ருச்யம் (வாயில் ருசியை அறியும். கோளங்களில் படிந்துள்ள அழுக்கை அகற்றி ருசியைத் தூண்டிவிடும்). ஸ்த்ரீபுஷ்பஜனனம் (கருப்பையைச் சார்ந்த முட்டையை நன்றாக உற்பத்தி செய்து மாதவிடாய் கோளாறுகளைப் போக்கும் அதனால்தான் பிரசவித்தவுடன் தாய்க்கு இதைப் பொரித்துப் பூண்டு, பனை வெல்லம், இஞ்சிச் சாறு இவைகளுடன் கொடுப்பது உண்டு), பவ்யம் (உடலுக்கு வலுவைக் கூட்டும்) லேஹ்மூர்ச்சாபஸ்மாரஹ்ருத்பரம் (மூர்ச்சை எனும் மயக்கநிலை, வலிப்பு ஆகிய நோய்களில் மிகவும் உபயோகமானது) என்று கூறுகிறார்.

முன் முடிவுகளை உடையுங்கள்!

நிமிஷங்கள் மாறுபடும்போது, நிகழ்பவை புதிது புதிதாய் நிகழும்போது எதிலும் மாற்றம் ஏற்பட்டே தீரும். மாற்றங்களை மகிழ்ச்சியுடன் ஏற்பவர்களே வாழ்க்கையுடன் ஒத்திசைவில் இருப்பவர்கள்.

“என்னால மட்டும் யார்கிட்டேயும் நல்ல பேர் வாங்கவே முடியலை!” ஆதங்கத்துடன் சொன்னவருக்கு ஆலோசனைகள் சொல்ல முற்பட்டார் நண்பர். “அப்படியா! நல்லபேர் வாங்கறதை அலுவலகத்தில் இருந்து ஆரம்பிக்கலாம். நாளை அலுவலகம் போனதும், எல்லாரிடமும் நல்லா சிரிச்சுப் பேசுங்க!”

“சேச்சே’, கோமாளின்னு சொல்லீடு வாங்கப்பா!”

“சரி! அழுத்தமா, ஆழமா, முகம்பார்த்து உறுதியா பேசுங்க!”

“அய்யய்யோ! திமிர் பிடிச்சவன்னு சொல்லிடுவாங்க!

“ஓ… அப்படீன்னா, குழைவா மென்மையா பேசுங்களேன்!”

“நீங்க வேறே! ரொம்ப வழியறதா நினைச்சுடுவாங்க! நான் நடந்துக்கற விதம்தான் சரி. ஆனா நல்லபேர் வாங்கவே முடியலை”.

இவரைத் தெரிகிறதா. இவர் தன் முன் முடிவுகளால் மூச்சுத்திணறும் மனிதர். எல்லாவற்றிலும் அவசரப்பட்டு தப்புத்தப்பான முன்முடிவுகளை உருவாக்கிக்கொண்டு திணறுபவர். இவரால் வாழ்க்கையுடனும், மனிதர்களுடனும் ஒட்டவே முடியாது. ஏன் தெரியுமா? வாழ்க்கையின் மிக அற்புதமான அம்சமே, ஒவ்வொரு விநாடியும் கணிக்க முடியாதவை என்பதுதான்.

பரிசுகள், பரவசங்கள், சவால்கள், வெற்றிகள் இவை எல்லாமே எதிர்பாராமல் எதிர்கொள்கிற போதுதான் அர்த்தமுள்ளவை ஆகின்றன. தங்கள் கணிப்பைத் தாண்டி எதுவுமே நிகழக்கூடாது என்று எண்ணுபவர்கள், வாழ்வை மிகக் குறுகிய வட்டங்களுக்குள் அடக்க முயல்பவர்கள். அவர்களுடைய எல்லைகளைக் குறுக்கிக் குறுக்கி, ஓட்டுக்குள் சுருங்கும் ஆமைபோல் உள்ளுக்குள் ஒடுங்குவார்கள்.

மிகப்பெரிய அறிவாளிகளும் மேதைகளும் கூட சின்னஞ்சிறிய பின்னடைவுகளோ தோல்விகளோ வந்தால்கூடத் தடுமாறி விடுகிறார்களே. ஏன்? அவர்கள் நிபந்தனைக்குட் பட்டு காரியங்கள் நிகழாதபோது கலங்குகிறார்கள்.

நாம் பார்க்கும் மனிதர்கள் எப்போதும் ஒரே மாதிரி இருப்பார்களென்றால் நம் எதிர் பார்ப்புகளுக்கு ஈடுகொடுத்தே எல்லாம் நிகழும். நிமிஷங்கள் மாறுபடும்போது, நிகழ்பவை புதிது புதிதாய் நிகழும்போது எதிலும் மாற்றம் ஏற்பட்டே தீரும். மாற்றங்களை மகிழ்ச்சியுடன் ஏற்பவர்களே வாழ்க்கையுடன் ஒத்திசைவில் இருப்பவர்கள்.

கன்ப்யூசியஸ், வாழுங்காலத்தில் பெரிய மேதையாய் மதிக்கப்பட்டார். அவருக்கு ஆயிரமாயிரம் சீடர்கள். அவர்களில் அநேகம்பேர் அரசர்கள். அவர் காலத்தில் வாழ்ந்த மகத்தான ஞானி, லாவோட்சு. ஒருமுறை கன்ப்யூசியசுக்கு லாவோட்சுவைப் பார்க்க விருப்பம் வந்தது. பிரபலங்களால் எங்கேயும் தனியாகப் போகமுடியாது. நூற்றுக்கணக்கான சீடர்கள் கன்ப்யூசியஸைப் பின் தொடர்ந்தார்கள்.

லாவோட்சு வசிக்கும் குகைக்கு வெளியே அனைவரையும் நிறுத்திவிட்டு கன்ப்யூசியஸ் உள்ளே நுழைந்தார். கண்விழித்த நிலையில், மிக அமைதியாய் ஆடாமல் அசையாமல், ஓர் அகல் விளக்கு போல் அமர்ந்திருந்தார் லாவோட்சு.

உள்ளே நுழைந்த கன்ப்யூசியஸை அவர் கண்டு கொள்ளவேயில்லை. மூன்று நான்கு முறை தொண்டையை செருமியும் கனைத்தும் காண்பித்த பிறகும் லாவோட்சுவிடம் சலனமேயில்லை. பொறுக்க முடியாமல், கன்ப்யூசியஸ் உரக்கச் சொன்னார், “நான் கன்ப்யூசியஸ்”.

லாவோட்சு நிமிர்ந்து பார்த்துவிட்டுச் சொன்னார், “அதனாலென்ன! கன்ப்யூசியஸாகவே இருங்கள்!” இவருக்கு தூக்கிவாரிப் போட்டது.  சமாளித்துக் கொண்டு சொன்னார், “எனக்குக் கொஞ்சம் பேச வேண்டும்”.

லாவோட்சு சொன்னார், “அதனாலென்ன! பேசுங்கள்! உங்களுக்கு பதில் சொல்லத்தான் இங்கு யாருமில்லை!!” கன்ப்யூசியஸ் அதிர்ந்து போனார்.

லாவோட்சு அகந்தையில் பேசவில்லை. அவரால் சலனப்படமுடியாது. பிறர் எதிர்பார்ப்புக் கேற்ப வளைந்துகொடுக்க முடியாது. கன்ப்யூசியசுக்கோ அவர் எதிர்பார்ப்பதுதான் நடக்க வேண்டும்.

கன்ப்யூசியஸ் மெல்லச் சொன்னார், “நான் போய்விட்டு வேறொரு சமயம் வருகிறேன்”. கடகடவென்று சிரித்துவிட்டு லாவோட்சு சொன்னார். “பொய் சொல்லாதீர்கள்! நீங்கள் ஒரு போதும் இங்குவர விரும்ப மாட்டீர்கள்!!

அடுக்கடுக்கான அதிர்ச்சி கன்ப்யூசியஸைக் கரைத்தது. அவருக்குள் இரும்பாய் இருந்த பிடிவாதம் இளகியது. வாழ்க்கையை அதன் போக்கிலேயே எதிர்கொள்ள லாவோட்சுவுடன் நிகழ்ந்த சந்திப்பு உதவியது. நம் எல்லோருக்குமே ஒரு லாவோட்சுவை சந்திக்க முடியாமல் போகலாம். ஆனால், இறுக்கத்தை உடைக்க இன்னொருவர் வரும்வரை காத்திருக்க வேண்டாம். முன் முடிவுகளை உடையுங்கள். முக மலர்ச்சியுடன் வாழ்க்கையை எதிர் கொள்ளுங்கள்……… திறந்த மனதோடு!

வெற்றியின் அடிப்படைகள்.....?

                                                            வெற்றியின் அடிப்படைகள்

எல்லோரையும் வாழ்த்தப் பழகுங்கள்.

எல்லாவற்றிலும் உள்ள நல்லதையே பாருங்கள்.

அன்றாட காரியங்களை நிறைவேற்றப் பழகுங்கள்.

நன்றி மனப்பான்மையை வளர்த்துக் கொள்ளுங்கள்.

பிறரிடம் தர்க்கம் செய்வதை நிறுத்திக் கொள்ளுங்கள்.

நல்ல எண்ணங்களுடன் உங்களது  நாளைத் தொடங்குங்கள்.

இடத்திற்கும் சூழ்நிலைக்கும் ஏற்ப நடக்க பழகிக் கொள்ளுங்கள்.

இப்பொதுதே எதையும் செய்துவிடுகிற பழக்கத்தைக் கொண்டிருங்கள்.

உலகம் போட்டி நிறைந்தது என்பதை முதலில் ஏற்றுக்கொள்ளுங்கள்.

உங்களுக்கென்று ஒரு உயர்ந்த சுய மதிப்பினை வளர்த்துக் கொளுங்கள்.

அவசியம் செய்யவேண்டிய காரியங்களை விரும்பக் கற்றுக்கொள்ளுங்கள்.

இவ்வுலகத்தில் நல்லதும் கெட்டதும் இருந்தே தீரும் என்பதைப் புரிந்து கொள்ளுங்கள்.

வசதியான மற்றும் சுகமான வீட்டிற்கான 5 எளிய வழிமுறைகள்!

இங்கே அழகான வீடுகள் மற்றும் பிற வசதிகள் நிறைந்தவீடுகளும் உள்ளன. இங்கே சில அதிர்ஷ்டம் வாய்ந்தவர்கள் இது இரண்டும் சேர்ந்து உள்ளவர்களாக உள்ளன. ஆனாலும் நீங்கள் இந்த வகையாக இல்லை என்றால், அனைத்தையும் மறந்து, சாதாரணமாக அமைதியாகவும் இருக்க முயல வேண்டும். பிறகு நீங்கள் உங்களுக்கு தேவையான வசதியான நிலையை உங்கள் வீட்டில் அதிகரிக்க அதற்கான வேலைகளை பார்க்க வேண்டும்.

உங்கள் இல்லம், உங்கள் நண்பர்கள் மற்றும் உறவினர்கள் கூட சேர்ந்து நிம்மதியாக இருக்கும்படியாக அமைய வேண்டும். இதில் உள்ள உட்புற பகுதிகள், நன்கு சுவாசிப்பதற்கும், ஓய்வு எடுப்பதற்கு ஏற்றதாகவும் இருந்தால் நல்லது. இங்கே சில எளிய வழிமுறைகள் உங்கள் வீட்டை அல்லது உங்கள் அறையை வசதியாக வை ப்பதற்காக கொடுக்கப்பட்டுள்ளது.
   
படி 1: அடிப்படை தொடக்கம்

அமைதி, மறுசுழற்சி, சிறிதாக்கு போன்ற வார்த்தைகளை மனதில் நிறுத்தி, அதை வீட்டில் செயல்படுத்தவும்.

படி 2: இருக்கை

வசதியான உட்காரும் இடத்தை உருவாக்கி, மென்மையான பட்டு போன்ற தலையணை, மற்றும் குஷன்களை மெத்தை அல்லது சோபாவில் விரிக்க வேண்டும். உங்கள் உட்காரும் இருக்கையில் தொங்க விடும் துணிகளை மனதை கவருவதாகவும் மற்றும் வசதியாகவும் இருக்கும்படி பார்த்துக் கொள்ள வேண்டும்.

படி 3: தளம்

 உங்கள் தளத்திலும் சில வேறுபாடுகளை கொண்டு வர வேண்டும். தளத்தில் கம்பளி விரிப்பு அல்லது பாய் போன்றவற்றை விரிப்பதன் மூலம் அந்த இடத்தில் அதிக அழகை சேர்க்கலாம். உங்கள் மெத்தை மற்றும் நாற்காலிக்கு அடுத்து போடப்படும் விரிப்புகள் இன்னும் அழகை அதிகரித்து காண்பிக்கும்.

படி 4: சரியான படுக்கை வசதி

 வசதியான மற்றும் சுகமான படுக்கை விரிப்புகளை நீங்கள் உங்களுக்காக பயன்படுத்தவும். நல்ல வசதியான மற்றும் அதிக அளவு நூல் உள்ள விரிப்புகளிலும் முதலீடு செய்தல். (அதிக அளவு நூலால் நெய்யப்பட்டுள்ள, சதுர வடிவ விரிப்புகள் பட்டு போன்றும் மற்றும் தொடுவதற்கு மிருதுவாகவும் உள்ளது)

படி 5: வசதியான கார்னர்கள்

இது இல்லாமல் இருந்தால் அனைத்து பாயின்ட்டுக்களுமே இழக்கப்படும். உங்கள் வீடு,கண்டிப்பாக மூலைகளை கொண்டு இருக்கும் - எந்த இடத்தில் நாம் புத்தகம், ஐபாட், ஒரு கப் காபி வைத்து அமர்ந்து இருப்போமோ அதுவே ஆகும். இந்த இடத்தை ஒரு சின்ன சொர்க்கமாக உருவாக்க வேண்டும். அந்த இடத்தில் உங்களுக்கு பிடித்தமான சோபா, நாற்காலி போன்றவற்றை போட வேண்டும். இந்த இடம் நல்ல வெளிச்சம் மற்றும் பீடத்தில் ஏற்படுத்தும் வெளிச்சம் போன்றவற்றையும் அல்லது நன்றாக வெளிபகுதிகளை பார்ப்பதற்கு ஏதுவான பெரிய ஜன்னல்களையும் கொண்டு இருக்க வேண்டும்.

மரவள்ளிக் கிழங்கு தோசை - 30 வகை தோசை! - 1

 தேவையானவை:

 புழுங்கலரிசி - 1 கப், மரவள்ளிக் கிழங்கு - சிறியதாக 1, காய்ந்த மிளகாய் - 6, சீரகம் - 1 ஸ்பூன், பெருங்காயம் - சிறிதளவு, உப்பு - தேவைக்கேற்ப, எண்ணெய் - தேவையான அளவு.


செய்முறை:

 மரவள்ளிக்கிழங்கை சிறு துண்டுகளாக நறுக்கி, 3 முறை பால் போக நன்கு கழுவிக் கொள்ளவும். புழுங்கலரிசியை கழுவி, 2 மணி நேரம் ஊற வைக்கவும். மிளகாய், உப்பு, பெருங்காயம், சீரகம் ஆகியவற்றை அரைத்து, அதோடு கிழங்கையும் சேர்த்து அரைக்கவும்


. பின்னர் ஊறிய அரிசியையும் சேர்த்து நன்றாக அரைக்கவும். (ஆட்டுரல் இல்லாதவர்கள் கிரைண்டர் அல்லது மிக்ஸியில் அரைக்கலாம்) ஆட்டிய மாவை தோசை ஊற்றும் பக்குவத்தில் வைத்துக் கொண்டு மெல்லிய தோசைகளாக ஊற்றி வெந்ததும் திருப்பி விட்டு, எண்ணெய்விட்டு சிவக்க வெந்ததும் எடுக்கவும். எல்லோரும் சாப்பிட ஏற்ற ஆரோக்கிய தோசை இது.

வீட்டில் கண்ணாடியை வைப்பதற்கான சில வாஸ்து டிப்ஸ்...

வீட்டில் கண்ணாடியை வைப்பதற்கான சில வாஸ்து டிப்ஸ்...

உங்கள் வீடு அல்லது அலுவலகத்தின் வாஸ்துவில் முக்கிய பங்கை வகிக்கிறது கண்ணாடி. ஆம், இது முற்றிலும் உண்மையே. கண்ணாடியை எங்கே மாட்டப் போகிறோம் என்பது மிகவும் முக்கியம். இதை சொன்னால் யாருமே நம்ப தயாராக இருக்க போவதில்லை. இதை நீங்கள் நம்ப மறுப்பது ஒன்றும் பெரிய ஆச்சரியம் கிடையாது. ஆனால் கண்ணாடி என்பது உங்கள் வீட்டினில் இருக்கும் ஆற்றல் சக்தியை அதிகரிக்கவும் செய்யும், உடைக்கவும் செய்யும் என்று விஞ்ஞான பூர்வமாக நிரூபிக்கப்பட்டுள்ளது.

வீட்டிற்குள் நுழையும் நேர்மறையான ஆற்றல் சக்தி உங்கள் வீட்டில் கண்ணாடி மாட்டப்பட்டிருப்பதை அமைப்பை சார்ந்திருக்கும். அனைத்து கண்ணாடிகளும் அது மாட்டப்பட்டிருக்கும் இடங்களும் வாஸ்து படி இருக்கிறது என்று கூற முடியாது. நீங்கள் கண்ணாடியை பொருத்தியிருக்கும் சில முறைகள், உங்கள் வீட்டை நேர்மறையான ஆற்றல் திறன் கொண்டதாக மாற்றும். ஆனால் கண்ணாடியை பொருத்தியிருக்கும் வேறு சில முறைகள், உங்கள் வீட்டை எதிர்மறையான ஆற்றல் திறன் கொண்டதாக மாற்றும்.

வீட்டிற்கு புது கண்ணாடியை கொண்டு வருவதற்கு முன்பி சில அடிப்படையான டிப்ஸ்களை நீங்கள் பின்பற்றிடுங்கள். நாங்கள் கூறப்போவதை விட இன்னும் அதிகமான டிப்ஸ் இருக்கத் தான் செய்கிறது. ஆனால் நாங்கள் கூறப்போவது மிகவும் அடிப்படையானது. இதை தான் பெரும்பாலான கண்ணாடி வாஸ்து டிப்ஸ் கூறுகிறது.
   
வீட்டில் வைக்கப்படும் கண்ணாடிக்கான வாஸ்து டிப்ஸ்:

நீங்கள் வீட்டில் ஒரு கண்ணாடியை மாட்ட எண்ணுகிறீர்களா? அப்படியானால் கீழ்கூரியதை கருத்தில் கொள்ள வேண்டும். உங்கள் படுக்கை பிரதிபலிப்பதை போல கண்ணாடியை மாட்டக் கூடாது. இதனால் அதிகமாக நோய்வாய் பட்டு எதிர்மறை ஆற்றலை பெறுவீர்கள். ஒரு வேலை உங்கள் தலைவாசல் கதவை பிரதிபலிப்பதை போல கண்ணாடி வைக்கப்பட்டிருந்தால் உங்கள் வீட்டிற்குள் அனைத்து நேர்மறையான ஆற்றல் திறனும் உள்ளேறும்.

அதே போல் உங்கள் வீட்டில் எதிர்மறையான ஆற்றல் சக்தி கொண்டுள்ள பொருட்களை நோக்கியே கண்ணாடியை வைத்திடுங்கள். இதனால் உங்கள் வீட்டில் இருக்கும் அனைத்து எதிர்மறை ஆற்றல்கள் எல்லாம் நீங்கும் என்று வீட்டில் கண்ணாடி வைப்பதற்கான வாஸ்து கூறுகிறது.
   
அலுவலகத்தில் வைக்கப்படும் கண்ணாடிக்கான வாஸ்து டிப்ஸ்:

நீங்கள் வேலை செய்யும் அலுவலக சூழ்நிலையில் அனைத்து நேர்மறையான ஆற்றல் திறன்களை கொண்டு வர வேண்டும். அவைகளை ஒன்றாக நிலைநிறுத்திட முயற்சிக்க வேண்டும். அதற்கு உங்கள் கண்ணாடி நேர்மறையான ஆற்றில் திறனை பிரதிபலிக்க வேண்டும். வளமையை கொண்டு வர உங்கள் கண்ணாடியை உங்களின் பண பெட்டகத்தை நோக்கி வைக்கலாம். குறுகிய பாதையில் கண்ணாடி வைப்பதை தவிர்க்க வேண்டும்.

 இது எதிர்மறை ஆற்றல் திறனை அதிகரிக்கும். குறுகிய பாதையில் எதிர்மறை மற்றும் மூட்டமருட்சி சூழலை தான் கண்ணாடி பிரதிபலிக்கும். அதனால் அம்மாதிரியான இடத்தில் கண்ணாடியை வைக்காதீர்கள். நல்ல காட்சியையும் நேர்மறையான ஆற்றல் திறனையும் பிரதிபலிக்கும் வகையில் கண்ணாடியை வைக்குமாறு பார்த்துக் கொள்ளுங்கள். நீங்கள் அமர்ந்திருக்கும் இடத்தில் உள்ள ஜன்னலுக்கு எதிர்புறமாக ஒரு கண்ணாடியை வையுங்கள். இது உங்கள் அலுவலகத்தில் நேர்மறையான ஆற்றல் திறனை அதிகரிக்கும்.
       
கண்ணாடி வைப்பதற்கான பொதுவான வாஸ்து டிப்ஸ்:

உங்கள் குளியலறையில் கண்ணாடி வைக்க விரும்பினால், வடக்கு அல்லது கிழக்கு திசையை நோக்கி வைக்கவும். வீட்டின் நடுவே சுவர் இருந்தால், வீட்டை இணைப்பில் வைக்கும் விதமாக கண்ணாடி வைக்கலாம். இரண்டு கண்ணாடிகளை எதிரெதிரே கண்டிப்பாக வைக்க வேண்டாம்.

இது உங்களுக்கு அமைதியின்மையை ஏற்படுத்துவதால் வாஸ்து சாஸ்திரம் இதை கண்டிப்பாக தவிர்க்க சொல்கிறது. குளியலறையை தவிர்த்து, வடக்கு அல்லது கிழக்கு திசை நோக்கி கண்ணாடியை வைக்காதீர்கள். அது நேர்மறையான ஆற்றல்களை எடுத்துச் சென்று விடும். உங்கள் பிம்பம் பிரதிபலிக்குமாறு கண்ணாடியை வைக்காதீர்கள். அதே போல் தலைவாசல் கதவை பார்த்தவாறு கண்ணாடியை வைக்க கூடாது.

கண்ணாடியை எங்கு வைக்கலாம், எங்கு வைக்கக்கூடாது என்பதற்கான சில டிப்ஸை தான் இதுவரை பார்த்தீர்கள். இவைகளை பின்பற்றினால் நேர்மறையான ஆற்றலை பெறுவது உறுதி.

என்னோட பசு! - குட்டிக்கதை

ஒரு கிராமத்தில் ஒருவன் இருபது பசுக்கள் கொண்ட மந்தையை வைத்திருந்தான். மற்றொருவன் பத்து பசுக்களை கொண்ட மந்தையை வைத்திருந்தான்.

அவர்கள் இருவரையும் பெரிய மந்தைக்காரன், சின்ன மந்தைக்காரன் என்று ஊரார் சொல்வது வழக்கம்.
பெரிய மந்தைக்காரன் ஒரு சமயம் குடும்பத்தோடு வெளியூர் போக நேரிட்டது. அப்போது தன்னுடைய மந்தையைக் கவனித்துக் கொள்ளும்படி, சின்ன மந்தைக்காரனிடம் சொல்லிவிட்டுச் சென்றான்.

போனவன் திரும்பி வருவதற்குள் தன்னிடமிருந்த மட்டமான மூன்று கன்றுகளையும் அவனுடைய மந்தைக்குள் புகவிட்டு, அதற்குப் பதிலாக மூன்று கடாரிக் கன்றுகளைத் திருட்டுத்தனமாகக் கொண்டு வந்து தன்னுடைய மந்தையில் சேர்த்துக் கொண்டான்.

வெளியூர் சென்றிருந்த பெரிய மந்தைக்காரன் திரும்பி வந்தான். கன்றுகள் மாறியிருப்பதை அவன் கவனிக்கவில்லை. சில நாட்களில் நோய் வந்து அவனுடைய மந்தையில் இருந்த பசுக்களும், கன்றுகளும் மாண்டு போயின. தன் குடும்பத் தேவைக்கே பால், நெய், மோர் இல்லாமல் கஷ்டப்பட்டான் பெரிய மந்தைக்காரன்.

சின்ன மந்தைக்காரன் திருட்டுத்தனமாக மாற்றிக் கொண்ட மூன்று கன்றுகளும் பெரியதாகி வளர்ந்து, கன்று போட்டுப் பால் கொடுக்க ஆரம்பித்தன.

ஒருநாள் பெரிய மந்தைக்காரன், சின்ன மந்தைக்காரனிடம் பால் வாங்கிக் காய்ச்சிக் குடிக்க நேர்ந்தது.
அந்தப் பாலின் ருசியைக் கண்டதும், இந்தப் பாலைக் கறந்த பசு தன்னுடையது என்பதை உணர்ந்து கொண்டான்.

தான் வெளியூர் சென்றிருந்தபோது சின்ன மந்தைக்காரன் தன்னுடைய கன்றுகளைத் திருடி வளர்த்திருக்கிறான். ஆகையால் அது என்னைச் சேர்ந்தது என்று நீதிமன்றத்தில் முறையிட்டான் பெரிய மந்தைக்காரன்.
சின்ன மந்தைக்காரனைக் கூட்டி வரச் சொல்லி விசாரித்தார் மரியாதை ராமன்.

""தகுந்த சாட்சியத்தோடு அதை நிரூபித்தால், நான் நீதிமன்றம் விதிக்கும் தண்டனைக்கு உட்படுகிறேன். இல்லையானால், என் மீது திருட்டுக் குற்றம் சுமத்தியுள்ள அவன் தண்டனைக்கு உள்ளாகட்டும்,'' என்று எதிர்வாதம் செய்தான் சின்ன மந்தைக்காரன்.

மரியாதை ராமன், அவர்கள் இருவரையும், பதினைந்து நாட்கள் சென்ற பிறகு மறுபடியும் வருமாறு உத்தரவிட்டார். அதன்பின், ஆட்டு எரு, மாட்டு எரு, குப்பை எரு ஆகிய மூன்றையும் தனித்தனியாகக் கீரைப் பாத்தியில் போட்டு விதைத்துப் பயிராக்கி, அம்மூன்று வகைக் கீரைகளையும் பறித்து ஒன்றாகக் கலந்து சமையல் செய்யுமாறு சொல்லி, அவற்றோடு பசுவின் தயிர், எருமைத் தயிர், ஆட்டுத் தயிர் மூன்றையும் ஒன்றாகக் கலந்து, பெரிய மந்தைக் காரனுக்கும், சின்ன மந்தைக்காரனுக்கும் விருந்து அளிக்கிற பாவனையில் இருவரையும் சாப்பிடும்படியாக ஏற்பாடு செய்தார் மரியாதை ராமன்.

இருவரும் சுவைத்து நன்றாகச் சாப்பிட்டனர்.

""விருந்தின் ருசி எப்படி இருந்தது?'' என்று கேட்டார் நீதிபதி.

சின்ன மந்தைக்காரன் எதுவும் கூறவில்லை.

""மூவெருவின் கீரையோடு முப்பாலின் நற்றயிரும் நாவார நான் ருசி கண்டேன்,'' என்றான் பெரிய மந்தைக்காரன்.
அதிலிருந்து உண்மையை உணர்ந்து கொண்ட நீதிபதி, அவன் யோக்கியன் என்பதை புரிந்து கொண்டார்.

பிரதிவாதியான சின்ன மந்தைக்காரனைப் பயமுறுத்தி அவன் வாய் மூலமாகவே, அவனுடைய திருட்டுச் செயலை வெளிப்படுத்தி, பசுவைப் பெரிய மந்தைக்காரனிடம் ஒப்படைக்கச் செய்யும்படி உத்தரவிட்டு, திருட்டுக் குற்றத்துக்குத் தண்டனையும் விதித்தார் மரியாதை ராமன்.